O RC Deportivo anunciou este venres un acordo co club británico Brighton & Hove Albion para o traspaso do xogador Florin Andone, de nacionalidade romanesa.
O Deportivo, que non ofrece cifra algunha sobre o monto do traspaso, indica que con esta operación conclúe, tras dúas tempadas, a relación entre o dianteiro e a entidade branquiazul, coa que disputou 69 partidos oficiais entre LaLiga e a Copa do Rei (4.655 minutos), marcou 18 goles e deu 6 asistencias.
O club galego agradécelle "moi sinceramente a Florin a súa entrega, sacrificio e traballo durante estes case 2 anos" e deséxalle "a maior das sortes no seu inmediato futuro profesional" na "súa traxectoria deportiva e persoal".
Andone foi incorporado en 2016 por algo máis de catro millóns de euros tras chegar a un acordo co Córdoba para facerse co 70 % dos seus dereitos.
A súa cláusula de rescisión en Primeira División superaba os 20 millóns de euros, pero co descenso do Deportivo a Segunda División baixaría a 6 millóns desde o próximo 1 de xullo.
Da cantidade de traspaso ao Brighton, o Córdoba levará o 30% segundo o acordado entre galegos e andaluces en 2016, aínda que o Deportivo esta tempada intentou adquirir esa porcentaxe aos cordobeses.
O Brighton quixo a Andone no mercado estival e volveu por el no invernal, no que ofrecía máis de 15 millóns de euros polo seu traspaso.