A Policía Nacional detivo a seis atletas profesionais, algún campión de España, nunha operación contra a dopaxe deportiva, na que se interviñeron medicamentos como hormonas do crecemento, testosterona, vitaminas inxectables ou material para autotransfusións de sangue.
A operación Relevo foi desenvolvida por axentes da Brigada Central de Delincuencia especializada da Policía Nacional. A súa comisaria xefe e o director da Axencia Española de Protección da Saúde no Deporte darán conta este xoves pola mañá en rolda de prensa dos detalles das investigacións.
Fontes policiais avanzaron a Efe que hai seis detidos en Madrid, Valencia e Calatayud (Zaragoza), entre eles destacados atletas de media e longa distancia e que algún foi campión de España.
