Os investigadores acharon medicamentos xunto ao cadáver de Blanca Fernández Ochoa

Os fillos de Blanca Fernández Ochoa teñen a intención de incinerar o corpo da medallista olímpica, unha vez identificado o cadáver, pero a súa decisión dependerá do que estime o xuíz instrutor do caso tras a autopsia que se realiza este xoves no Instituto Anatómico Forense de Madrid. 

Segundo informa El Mundo, xunto ao corpo foron achados medicamentos que a exesquiadora tomaba para tratar os seus problemas psicolóxicos.

Os forenses están a practicarlle este xoves a autopsia preliminar ao cadáver, cuxo informe arroxará luz sobre as causas da súa morte. No entanto, o corpo de Blanca podería quedar no Anatómico ata o sábado para realizarlle máis probas adicionais forenses e toxicolóxicas, informaron a Europa Press fontes da familia. 

Dependendo da decisión do xuíz, o corpo será trasladado a un crematorio próximo ou será inhumado temporalmente. A familia xa reservou unha sala do tanatorio de Cercedilla para que poida ser velado o corpo a partir desta tarde. 

A empresa de servizos funerarios Albia, coa que colaboraba en causas solidarias a exesquiadora, fíxose cargo de forma altruísta de todos os gastos do enterro.