A selección española concentrouse na residencia da Cidade do Fútbol con tres das catro novidades esperadas na convocatoria de Luís Enrique —Marc Bartra, Koke Resurrección e Paco Alcácer—, pola paternidade do galego Jonny Otto que se sumará ao grupo o martes.
Os internacionais españois que disputarán o partido amigable en Cardiff ante Gales e a terceira xornada da liga das Nacións en Sevilla fronte a Inglaterra, fóronse incorporando á concentración durante a mañá do luns.
Foron recibidos 22 futbolistas polo seleccionador Luís Enrique Martínez e o seu corpo técnico. Todos os citados menos un, Jonny, que recibiu o permiso para gozar dun día especial tras ser pai.
A primeira chamada da selección absoluta para Jonny, pola baixa por lesión de Dani Carvajal no lateral dereito, coincidiu co parto da súa muller nas últimas horas e o nacemento do seu fillo.
O xogador do Wolverhampton perderase o primeiro adestramento que España completará en sesión vespertina na Cidade do Fútbol, para incorporarse na mañá do martes e sumarse á dinámica de grupo antes de viaxar a Cardiff.
