O novo xogador do Deportivo Michael Krohn-Dehli asegurou este martes, na súa primeira conferencia de prensa como integrante do conxunto branquiazul, que é a "mesma persoa" que cando defendía a camiseta do Celta "pero agora" é do conxunto coruñés, máximo rival dos celestes, e entende que en Vigo estean "un pouco enfadados".
"É normal que estean un pouco enfadados, pero son a mesma persoa, non cambiei porque agora vaia a xogar no Deportivo", comentou o centrocampista tras adestrarse por primeira vez co conxunto coruñés ao que chegou procedente do Sevilla e co que asinou polo que resta de tempada e a seguinte.
"Estiven tres anos alí, bos anos e agora estou no Deportivo, na Coruña, pero aínda me gusta Vigo, gústame a cidade, son a mesma persoa que estivo alí, pero agora estou no Dépor e vou axudar ao máximo ao equipo e estou aquí para xogar ao fútbol", comentou o xogador de nacionalidade danesa.
Admitiu que a súa fichaxe "foi moi rápida" e advertiu de que "cando chegou a oferta, tiña que ver" que era "o mellor" para el "futbolisticamente" e apuntou que o Dépor "ten bo equipo, con bos xogadores" e por iso quixo incorporarse ao club galego.
BEN FISICAMENTE. O ex xogador do Celta afirmou que está "ben" a nivel físico tras adestrar "todo o ano normal co Sevilla" e xogar " bastante" na primeira parte do campionato co arxentino Eduardo Berizzo no banco do conxunto andaluz, que o destituíu en decembro.
Krohn-Dehli admitiu que "é diferente" o obxectivo que ten o Deportivo esta tempada respecto ao do Sevilla, pero no día a día é "o mesmo: gañar partidos e sumar puntos". Declarou que ao seu novo equipo pódelle "axudar con experiencia e bo traballo" e explicou que está capacitado para "xogar en moitas posicións".
Asegurou que "o ambiente" no equipo "está ben" a pesar de atoparse en posicións de descenso.
