O xuíz Santiago Pedraz deixou en liberdade sen medidas cautelares ao exdirectivo da Federación Catalá de Fútbol (FCF) José Contreras Arjona, detido este martes xunto ao vicepresidente económico da Real Federación Española de Fútbol (RFEF) e expresidente da catalá, Andreu Subies.
Segundo informaron a Efe fontes xurídicas, Contreras quedou en liberdade tras declarar ante o maxistrado da Audiencia Nacional, que ordenou o seu arresto dentro do caso Soule, que levou á detención do expresidente da RFEF Ángel María Villar.
Está previsto que Subies comece a declarar ante o xuíz ás 14.30 horas, despois de que na mañá deste mércores fagan o propio Contreras e outros tres investigados na causa relacionados con el pero que non foron arrestados.
Trátase de Albert Baza, ex secretario xeral da federación catalá; José María Castillón, administrador xeral da RFEF, e Miguel Pardo, xerente da Mutualidad de Futbolistas da Federación de Fútbol (Mupresfe).
A estas cinco persoas investígaselles por un presunto desvío de diñeiro desde a Mupresfe á federación catalá, que logo outorgou contratos supostamente inflados de obras nas súas sedes territoriais a sociedades vinculadas a Contreras.
Na operación levada a cabo o martes pola Garda Civil practicáronse, ademais das dúas detencións, seis rexistros, un deles na sede da FCF.
Subies foi presidente da Federación Catalá de Fútbol entre 2011 e xullo de 2018, cando dimitiu para ir como vicepresidente da Federación Española de Fútbol, dirixida por Luís Rubiales tras o cesamento de Villar logo da súa detención polo suposto desvío de fondos na entidade.
A operación deriva da investigación sobre o saqueo millonario, de polo menos 45 millóns de euros, nas arcas da RFEF durante o mandato de Villar, que foi detido en xullo de 2017 e estivo dez días en prisión provisional ata que abonou unha fianza de 300.000 euros.
