O director deportivo do RC Deportivo, Carmelo del Pozo, asumiu este luns a organización da filial branquiazul, pechacancelas no Grupo I de Segunda B, que, ademais, cambia de adestrador por segunda vez esta tempada. O Deportivo e Sergio Pellicer rescindiron o contrato que os vinculaba e o terceiro adestrador do Fabril esta tempada será José Luís Míguez Iglesias, Luisito, extécnico do Pontevedra CF.
O club galego anunciou primeiro que a dirección deportiva do fútbol profesional do club, encabezada por Carmelo del Pozo, facíase cargo "directamente a xestión organizativa do Fabril". Ata agora, a xestión estrutural da filial deportivista correspondía á dirección de fútbol formativo do club, con Albert Gil á cabeza.
Logo de comunicar ese cambio, o Deportivo anunciou que chegara a un acordo con Sergio Pellicer para dar por concluída a etapa do técnico castellonenco á fronte do Fabril.
O Deportivo agradécelle "moi sinceramente o seu traballo durante estes meses á fronte da filial deportivista" e deséxalle "a maior das sortes no seu futuro profesional e persoal". Pellicer fíxose cargo do Deportivo B en outubro tras a destitución de Perico Ramallo, que dirixiu ao equipo as nove primeiras xornadas da tempada.
Desde o próximo fin de semana, sentará no banco do Fabril Luisito, que, ademais do Pontevedra, adestrou ao Racing de Ferrol e ao Ourense.
