O popular seguidor da selección española de fútbol Manolo 'o do bombo' deixará de rexentar o seu bar-museo, situado fronte ao Estadio Mestalla, logo de case 30 anos, pero seguirá animando á Roja. "Quero que co bar quede alguén ao que lle guste o fútbol, e eu colaboraría", sinalou o veterano incha da selección española, de 70 anos.
A decisión de traspasar o establecemento, que rexenta desde hai 29 anos, foi da dona do local, segundo comentou Manolo, quen considera que é unha "boa decisión". Ademais, explicou que existe a posibilidade de pór nun local todos os recordos do bar e unha barra para que "os pais poidan ir cos nenos a ver o que hai".
Se estou coa selección non podo estar no bar. Levo dez Mundiais, sete Eurocopas e 400 partidos
Manolo explicou que pasou por 7 operacións e dálle "pena" deixar o bar tras 30 anos. "A xente anímame a seguir co bar, pero algúns si que se dan conta de que estou maior e non podo continuar", engadiu.
"Se estou coa selección non podo estar no bar. Levo dez Mundiais, sete Eurocopas e 400 partidos, a xente quéreme e vou continuar", asegurou Manolo.
Respecto ao novo seleccionador español, Luis Enrique, manifestou que o coñece desde hai moitos anos" e que é un "pouco duro", pero sinalou que convocará os xogadores que "loiten pola camiseta e non polo seu nome", e desexou o mellor tanto ao técnico asturiano como á selección.
