Mohamed: "Para gañar ao Atlético hai que facer un partido case perfecto"

O adestrador do Celta de Vigo, Antonio Mohamed, considera que o duelo deste sábado contra o Atlético de Madrid será "unha proba forte" para o seu equipo, ao que ve preparado para gañar, o que pasa, ao seu entender, por facer un encontro "case perfecto".

"Temos que ser un equipo solidario. Estamos nunha etapa de formación e debemos prestarlle moita atención aos detalles. Ser intelixentes e, sobre todas as cousas, ser un equipo. Paréceme que é unha proba moi forte e que chega moi rápido no torneo. Vaime dar moita información sobre os aspectos nos que temos que mellorar", comentou.

Na súa comparecencia ante os xornalistas, o técnico arxentino avanzou que repetirá o mesmo once que aliñou o pasado luns ante o Levante, aínda que non descartou algún cambio táctico.

"Hugo -Mallo- pode arrincar máis atrás e Iago -Aspas- máis aberto", puntualizou Mohamed, a quen lle preocupa a "xerarquía" de xogadores como Diego Costa, Lemar ou Griezmann e o perigo do Atlético nas accións de contraataque.

"Competir, competir e competir. Iso é o que temos que facer. Se me dan o balón, eu vouno agarrar. O que si imos tomar son as precaucións necesarias para que non nos collan ao contragolpe. Nós queremos bailar, ir á fronte e gañar. É o único no que pensamos", reiterou.

O técnico celeste recoñeceu que a nivel persoal será un duelo "especial" porque suporá o seu reencontro co seu "amigo" Diego Pablo Simeone: "Non nos vemos desde fai un par de meses e non nos enfrontamos desde hai anos. Vai ser moi lindo volver atoparnos dentro dun campo. É un amigo e quéroo moito. Estou moi orgulloso de todo o que conseguiu".

"Non fixemos ningunha aposta, é un partido de fútbol e seremos rivais durante 90 minutos. Enfrontámonos a un dos tres mellores adestradores de Europa, a un técnico que logrou situar ao seu equipo no máis alto a nivel mundial. É moi lindo ver triunfar a un amigo dese xeito", manifestou.