Os avogados da muller que acusou a Cristiano Ronaldo de tela violado en 2009 aseguraron este mércores en rolda de prensa que sofre depresión e que considerou o suicidio a raíz do presunto suceso.
"Tras a agresión sexual en 2009 ela experimentou depresión, pensamentos intrusivos, considerou o suicidio, abusou do alcol, tivo dificultades para manter relacións persoais e un emprego", dixo o avogado Leslie Stovall.
A rolda de prensa tivo lugar nas Veigas (EE UU), cidade na que presuntamente tivo lugar a violación despois de que Ronaldo, que acababa de fichar polo Real Madrid, e a muller, Kathryn Mayorga, coñecésense na discoteca Rain, xa pechada.
En 2010, tras a violación –segundo a demanda–, Mayorga accedería a un pacto de silencio de 375.000 dólares con representantes do futbolista.
Os avogados da muller presentaron a semana pasada unha demanda para invalidar ese pacto, alegando que as consecuencias psicolóxicas da agresión facíana "incompetente" para alcanzar este tipo de acordos.
Mayorga foise temporalmente de EE UU para afastarse da polémica e non quere falar cos medios de comunicación
Acto seguido, a Policía das Veigas anunciou que reabrira a investigación sobre a violación, ocorrida presuntamente en xuño de 2009.
Mayorga, que nese entón tiña 24 anos e agora ten 34, foise temporalmente de EE UU para afastarse da polémica e non quere falar cos medios de comunicación, explicaron os avogados.
O futbolista, que agora milita no Juventus de Turín (Italia), negou este mércores a través de Twitter as acusacións de Mayorga.
"Nego de xeito taxativo as acusacións que me foron dirixidas. A violación é un crime abominable que vai en contra de todo o que son e o que creo. Non quero alimentar o espectáculo mediático creado por persoas que queren promoverse a si mesmas á miña costa", escribiu Ronaldo. "A miña conciencia está limpa e permíteme esperar con tranquilidade os resultados de todo tipo de investigacións", proseguiu.
