Un comité parlamentario británico acusou a sir Bradley Wiggins e ao seu equipo Sky de cruzar unha "liña ética" ao usar un poderoso fármaco para gañar carreiras, incluída a histórica vitoria do ciclista no Tour de Francia de 2012. Nun informe de 52 folios, o Comité Dixital, de Cultura, Medios e Deportes da Cámara dos Comúns sinalou que o equipo Sky utilizou medicamentos para mellorar o rendemento de ciclistas e non só para o tratamento con fins médicos.
O documento indica que o equipo utilizou o antiinflamatorio triamcinolona para preparar a Wiggins no Tour de Francia. No entanto, unha investigación da axencia británica antidopaxe UK Anti-Doping (Ukad, polas súas siglas en inglés) pechouse o pasado novembro sen poder establecer se Wiggins recibiu o citado desconxestionante, prohibido nas competicións.
Os medios aseguran este luns que se Wiggins tomou este fármaco o último día da carreira Criterium Dauphine en 2011, que se disputa nos Alpes franceses, suporía unha violación das regras antidopaxe, o que levaría unha sanción de dous anos.
O informe alega que se utilizaron fármacos "por Team Sky, dentro das regras da Axencia Mundial Antidopaxe (Wada), para mellorar o rendemento dos ciclistas, non só por necesidade médica".
O equipo Sky rexeitou o documento, mentres que Wiggins expresou nun comunicado a súa tristeza de que "a xente sexa acusada de cousas que nunca fixo". "Creo que estas acusacións son bastante tristes. A xente pode ser acusada de cousas que nunca fixo e despois son consideradas como feitos. Rexeito enerxicamente que calquera droga fose utilizada sen causa médica", explicou o exciclista en Twitter.
No palmarés de Wiggins, quen foi investido Sir en 2013, destaca a vitoria no Tour de 2012 ademais de gañar catro medallas de ouro olímpicas na modalidade de ciclismo en pista e unha máis de ouro na proba de contrarreloxo en Londres 2012. A estes logros hai que unir a vitoria no Mundial de contrarreloxo de 2014 e a París-Niza de 2012, entre outros cordóns menores.
No Tour de 2012, o equipo Sky copou as dúas primeiras posicións do podio, con Wiggins en primeira posición e o tamén británico Chris Froome, en segunda; ademais, o conxunto fíxose con seis etapas (tres para Mark Cavendish, dúas para Wiggins e unha para Froome) e finalizou segundo na clasificación por equipos.
O Sky xa estivo envolvido nun escándalo por dopaxe o pasado mes de decembro, cando a Unión Ciclista Internacional (Uci) confirmou que Froome deu positivo por salbutamol, un broncodilatador, na última edición da Volta Ciclista a España.
