O expárroco da localidade mallorquina de Selva, de 74 anos, xulgado hai dúas semanas tras ser acusado de abusar sexualmente dunha nena de 12 anos, foi absolto pola Audiencia de Palma. Segundo informou o Tribunal Superior de Xustiza de Baleares, a sección primeira da Audiencia Provincial sentenciou que a versión exculpatoria que expuxo o sacerdote na vista e a que defenderon as acusacións son igualmente verosímiles.
Os maxistrados consideran tan firme o argumento da defensa do antigo párroco, segundo o que a denuncia contra el tería a súa orixe no interese do pai en obter un beneficio económico, como a declaración da nena de que sufriu tocamentos do sacerdote unha noite de febreiro de 2015 na que quedou a durmir na súa casa.
Ante esta contradición, en aplicación do principio de que ante a dúbida debe primar o beneficio para o imputado (in dubio pro reo), o tribunal emitiu un fallo absolutorio. "Hai elementos de proba que conducirían a afirmar a realidade dos abusos referidos pola menor. Pero hai outros datos que non nos permiten excluír a versión do acusado respecto de que a denuncia" que presentou o pai da menor estaría motivada polo seu afán de vingarse pola perda dunha comisión que o sacerdote lle prometeu por mediar na venda dunha casa da súa propiedade finalmente frustrada, argumenta o tribunal.
Só dá por probado que nunha data non precisada entre finais de novembro de 2014 e febreiro de 2015 a nena quedou a durmir na casa do relixioso porque este e o seu pai, que tiñan amizade desde había anos, acordaran que o párroco falaría coa menor para axudala a superar a morte recente da súa nai e o feito de que o seu pai fora ter un fillo coa súa nova parella.
O pai denunciou o suposto abuso a finais de maio e situouno no mes de febreiro, lapso temporal que xustificou na tardanza da nena en contarlle que o cura se deitou na mesma cama ca ela e tocoulle a tripa, coa escusa de acougarlle unha dor, antes de baixar a man cara aos seus xenitais, ao que ela respondeu cunha cotenada nunha primeira ocasión e cando repetiu a acción posteriormente.
O tribunal entende que o relato que fixo a menor na súa declaración por videoconferencia na vista foi "consistente" e coincidía en todos os detalles co de declaracións anteriores, e destaca ademais que foi avalada polas avaliacións das dúas psicólogas que a trataron, unha das cales a segue atendendo na actualidade.
"Concorrerían corroboracións obxectivas periféricas que sustentarían a petición de condena (3 anos de prisión) formulada polas acusacións", indican os maxistrados, que engaden, con todo, que tamén "concorren outra serie de circunstancias que non permiten excluír a versión dos feitos ofrecida polo acusado".
O sacerdote contou que o pai da nena esixíralle 60.000 euros coa ameaza de que o denunciaría por abusar dela se non atendía a súa demanda, unha conversación que a asistenta do acusado dixo escoitar, aínda que se produciu en mallorquino e ela, brasileira, afirmou que non entendía ben o catalán da illa.
Para os maxistrados un feito determinante que daría verosimilitude a esta versión é "a tardanza en interpor a denuncia", posto que aínda que a esixencia de diñeiro non é incompatible coa verdade dos tocamentos, "tampouco exclúe a posibilidade de que todo iso non sexa senón unha manobra espuria de pai".
O tribunal dubida ademais de que os feitos ocorresen en febreiro e cre máis probable que, como sostivo o cura, sucedesen tres meses antes, o que reforzaría a tese do lapso sospeitoso entre o coñecemento do presunto abuso por parte do pai e a presentación da denuncia.
"A proba de cargo practicada (...) impídenos alcanzar a convicción, fóra de toda dúbida razoable, respecto da participación do acusado na comisión dos feitos xustizables que foron obxecto de acusación", argumentan os maxistrados para xustificar a absolución.
