A Policía Nacional bloqueou seis páxinas web desde as que os seus usuarios accedían a enlaces para ver partidos de fútbol, películas, series ou libros, así como gozar de forma ilícita doutros contidos multimedia como videoxogos, programas de computador ou música.
Por estes feitos, foron arrestadas en Madrid dúas persoas, responsables de dúas sociedades mercantís que xestionaban as páxinas de internet das que obterían máis dun millón de euros en beneficios por ingresos en publicidade. Só a través dunha desta web pirata, destaca a Policía, embolsáronse 839.951 euros.
Co obxectivo de dificultar aos investigadores a súa identidade, os detidos utilizaban distintos servidores de España, Francia e Canadá.
A investigación comezou en xullo de 2016 cando unha representante da liga Nacional de Fútbol Profesional interpuxo unha denuncia contra unha web na que se facilitaba o acceso a partidos de fútbol sen dereito da súa exhibición, aínda que se comprobou que se ofrecía o visionado a abonados.
Un ano despois, en marzo de 2017, a Federación para a Protección da Propiedade Intelectual denunciou a outra web que puña a disposición do público en xeral enlaces para a distribución de diverso contido, audiovisual e multimedia, protexido por dereitos de autor.
As pescudas policiais conduciron á identificación dos seus responsables, dous homes dunha mesma familia, e descubriron outras catro páxinas dedicadas ao mesmo ilícito penal que ofrecían partidos de fútbol, películas, series, videoxogos, programas de computador, música e libros.
Distribuían o contido audiovisual e multimedia vulnerando os dereitos de autor en distintos formatos -descarga directa, streaming e distribución P2P- o que permitía unha maior difusión do material. Realizáronse tres rexistros, en Alacante e Madrid, nos que se incautaron 14 discos duros, tres móbiles e un portátil.
