PSOE e Podemos acordaron propor ao xornalista Andrés Gil, actual xefe de Política de eldiario.es como presidente de RTVE, segundo confirmou este venres o secretario xeral de Podemos, Pablo Iglesias. "Parece que finalmente o acordo será con Andrés Gil. Na negociación houbo unha cuestión que quedou clara desde o principio: TVE ten que deixar de ser un aparello de propaganda do partido que goberne", afirmou Iglesias nunha entrevista en Antena 3, recollida por Europa Press.
O xornalista madrileño, que antes foi subdirector do diario ADN e traballou en El País, foi a terceira vía ante os vetos mutuos que se impuxeron PSOE e Podemos. Os socialistas ofrecéranlle o cargo ao veterano xornalista Arsenio Escolar, exdirector de 20 Minutos, mentres a formación morada quería promover á lucense Ana Pardo de Vera, directora de Público.
A próxima semana antóllase decisiva para a prometida renovación do ente público por parte de Pedro Sánchez. A presidenta do Congreso, Ana Pastor convocou unha sesión plenaria para o vindeiro luns, día 2 de xullo, pola tarde para un primeiro intento para elixir aos seis membros do Consello de RTVE que lle corresponde nomear.
O Pleno foi pedido polo Goberno, unha das opcións que recolle o Regulamento ao tratarse dunha sesión extraordinaria, xa que xullo é un mes inhábil a efectos parlamentarios, segundo establece a Constitución.
Fontes da Cámara indicaron que os nomes dos candidatos deberán rexistrarse antes das doce do mediodía do luns e ás 16 horas empezará a sesión plenaria onde se procederá a unha primeira votación por papeleta en urna.
Nesa cita, os conselleiros necesitan o respaldo de dous terzos da Cámara, o que supón 234 deputados. No caso de que non logran ese mínimo, haberá que celebrar unha nova sesión plenaria ás 48 horas, o que xa se calcula para o mércores día 4 de xullo, onde xa bastaría coa maioría absoluta (176 votos), sempre que os seus nomes estean avalados por polo menos catro grupos parlamentarios.
A Cámara Baixa segue así o itinerario que trazaron os letrados no seu informe xurídico sobre as obrigacións que impón o decreto lei aprobado polo Goberno para unha renovación urxente e transitoria do Consello de RTVE.
Dada a urxencia do procedemento, non haberá tempo para que os candidatos ao Consello da Corporación sométanse a un exame previo na Comisión Consultiva de Nomeamentos, unha opción que os letrados aceptaron para axilizar os prazos.
O SENADO SI EXAMINARÁ OS ANDIDATOS. O Senado, pola súa banda, debe elixir aos outro catro membros do novo Consello de RTVE, para o que xa programou dúas sesións plenarias os días 3 e 5 de xullo. No seu caso, a Cámara Alta si que previu un exame previo na súa Comisión de Nomeamentos, que se prevé para este luns.
