O expresidente do Goberno Mariano Rajoy evitou pronunciarse sobre os candidatos do seu partido para sucederlle no liderado do PP e comentou que, unha "vez retirado da política", o que poida dicir é "moi pouco relevante".
ás portas do Rexistro da Propiedade número 1 do municipio alacantino de Santa Pola, onde se incorpora hoxe tras renunciar ao seu escano no Congreso, Rajoy foi preguntado por numerosos xornalistas se apoia a algún dos aspirantes a sucederlle á fronte do PP.
"A miña posición é coñecida: díxeno no Comité Executivo e na Xunta Directiva nacional. Convoquei un congreso e agora son os militantes do PP os que teñen que dicir democraticamente quen queren que sexa o seu líder, e o que eu diga é moi pouco relevante", explicou.
"Non teño que transmitirlles nada", apuntou en referencia aos aspirantes populares, "salvo o que lles dixen: que me ía, que a vida continúa e que o PP é un gran partido, a primeira forza de España, e que estou seguro de que ao que elixan os militantes farao moi ben".
O expresidente e aínda líder nacional do PP evitou máis preguntas dos informadores e entrou no Rexistro da Propiedade número 1 de Santa Pola, de cuxa praza é titular, mentres agradecía "moito a presenza" dos medios de comunicación.
