O presidente de Cidadáns, Albert Rivera, deu hoxe por roto o acordo que tiña co Goberno sobre o apoio do seu partido á aplicación do 155 en Cataluña ao non aplicarse a Constitución como entende que debería facerse.
"Ata aquí chegamos con esta displicencia", advertiu Rivera nos corredores do Congreso logo dun tenso debate na sesión de control, aínda que esta decisión non ten ningún efecto sobre os acordos que xa teñen, incluídos os Orzamentos, tal como asegurou.
Este distanciamento escenificouse xa no Pleno, onde Rivera ameazou ata dúas veces a Rajoy con retirarlle o apoio de Cs se non recorría ante o Tribunal Constitucional o voto delegado de Antoni Comín e Carles Puigdemont e vixiaba "de cerca" aos separatistas.
Segundo dixo despois, non é Cidadáns o que rompe senón o Goberno por mirar "cara a outro lado" en Cataluña, reprochando ao Executivo que desde hai tres meses non lles informen de nada relacionado con Cataluña.
Ata entón dábanlles conta de todos "os pasos" e tomaban "decisións" con eles, pero desde que van "mal" nas enquisas e teñen "batifondos internos", dixo, non conta co seu "socio de investidura, socio de Orzamentos e socio do 155".
Logo de ser acusado de "aprovechategui" por Mariano Rajoy no Pleno nunha cuestión tan importante como esta, Rivera insistiu en acusar o presidente de ter unha posición "absolutamente" displicente en moitas ocasións, suxerindo que pode estar "máis cómodo" en Cataluña cos nacionalistas, co PNV ou co que "marque" ERC.
Non entende que o Goberno non recorra ante o alto tribunal o voto delegado de dous "fuxidos" da Xustiza cando, na súa opinión, ten "legitimación procesual" para facelo e recorreu outras decisións da Mesa do Parlament "exactamente iguais".
