A xefa dos socialistas españois na Eurocámara e membro da Executiva do PSOE, Iratxe García, afirmou este mércores que descoñece se o exvicepresidente do Goberno e ex líder socialista Alfredo Pérez Rubalcaba rexeitou unha proposta da dirección do partido para ser candidato ao Concello de Madrid.
"Non coñezo de primeira man cal foi a resposta do compañeiro Rubalcaba", dixo García nunha entrevista en RNE, recollida por Europa Press.
A dirixente socialista non negou a oferta, que publican varios medios, senón que se limitou a dicir que non coñece a resposta do que fose candidato socialista á Moncloa en 2011. García si quixo dicir que Rubalcaba é "un compañeiro respectado, querido e un referente do socialismo en España e en Madrid".
Doutra banda, tampouco deu pistas de se a lista do PSOE para as eleccións europeas podería encabezala o ministro de Exteriores, Josep Borrell, ou a de Economía, Nadia Calviño, e só dixo que a partir de xaneiro comezará o proceso para decidir as candidaturas e que os militantes deberán expresar a súa opinión.
García deu por feito que, nas eleccións do 26 de maio, cando coincidirán europeas, municipais e autonómicas, haberá unha parte de política nacional que non se poderá "evitar", pero tamén defendeu que, posto que hai eleccións diferentes, falarase de distintas cuestións.
Para o PSOE, dixo, o importante é "falar das persoas" e dos seus problemas algo que, ao seu xuízo, é precisamente o que queren os cidadáns. Ademais, asegurou que, para o seu partido, as europeas non son eleccións "de segunda", senón que ten claro que para resolver os problemas fai falta "máis e mellor Europa", así que se envorcará na convocatoria.
