Os labores de extinción do incendio declarado nunha nave do polígono industrial da Granxa, no Porriño, continúan esta mañá de xoves despois de que os servizos de urxencia traballasen durante toda a noite refrixerando e confinando os dous puntos de combustión aínda activos, informa o 112.
O incendio declarouse na tarde deste martes no exterior da planta de reciclaxe de chatarra e ferralla da empresa Alumisel e desde entón veñen traballando os servizos de extinción, que agora actúan sobre última zona afectada e, segundo as previsións, aínda quedan varias horas por diante.
Permanecen na zona os bombeiros do Porriño, O Salnés, Vigo e Pontevedra, así como o grupo municipal de urxencias de Mos e voluntarios de Protección Civil do Porriño e Mos.
Tamén está o grupo de apoio loxístico da Axencia Galega de Urxencias con máis recursos e medios para seguir controlando e refrigerando o perímetro do incendio.
O incendio, que non causou danos persoais, declarouse ás 15.25 horas deste mércores e xerou unha forte carga térmica debido á ferralla calcinada.
Precisamente esta carga de combustión é a que está a prolongar as tarefas de extinción, aínda que o incendio mantense controlado, confinado e sen risco para as persoas.
