Aqueles que se espremeron os miolos para acuñar o xa estendido termo veroño, resultado da fusión das palabras verán e outono, enfróntanse agora a outro complicado reto: darlle nome á anomalía meteorolóxica na que está sumida Galicia nas últimas semanas.
E é que, en pleno inverno, este martes alcanzáronse nin máis nin menos que 27,9 graos centígrados no municipio ourensán de Leiro. E 26,6º en Pontevedra, 26,5º en Tui, 26,3º en Lourenzá... ás portas do Entroido, o inverno disfrazouse de verán.
Tras varios días de máximas moi por encima do normal nesta época do ano, o mércores regresa a choiva. Pero este martes os mercurios aínda estaban disparados. En Mondoñedo chegouse aos 24,8º. Na Coruña alcanzáronse os 24,4º, igual que en Bóveda. En Vigo o termómetro marcou 23,8º; en Lugo, 23,6º; en Sarria, 23,2º...
Bos días! Nova xornada anticiclónica, primaveral pola tarde. Destacan os valores mínimos da madrugada tan diferentes entre os vales do interior e o litoral. Entre o lugar máis frío, Calvos de Randín -3ºC e o máis suave Castro Vicaludo, Oia 14.4ºC temos máis de 17ºC de diferencia. pic.twitter.com/TjBY7nE2Qj
— MeteoGalicia (@MeteoGalicia) 26 de febreiro de 2019
Tamén houbo temperaturas negativas en lugares como Verín (-2,4º) ou Rozas, en Castro de Rei (-0,6º). E Lugo capital quedou en valores positivos polos pelos (-0,4º).
