O xulgado de instrución número tres de Vigo, en funcións de garda cando se derrubou unha pasarela no festival O Marisquiño, co resultado de 428 persoas feridas, investiga a presunta comisión dun delito de lesións imprudentes, segundo informou o Tribunal Superior de Xustiza de Galicia.
A investigación trata de esclarecer do afundimento do peirao e as eventuais responsabilidades que se poidan derivar. Tras recibir un oficio dando conta do sucedido e un informe fotográfico elaborado pola Policía Nacional, o xulgado decidiu centrar as pescudas en se se produciu un presunto delito de lesións imprudentes, "sen prexuízo de ulteriores cualificacións ao longo da instrución", aclara o alto tribunal galego.
"Para unha mellor e máis áxil tramitación da causa, o xulgado decidiu que se abra unha peza separada por cada un dos prexudicados", explica o TSXG,
A comisión xudicial, formada pola titular do xulgado, a letrada da Administración de Xustiza e un membro do Ministerio Fiscal, constituíuse o luns pola tarde na zona do suceso para realizar unha inspección ocular.
Tras a mesma, a xuíza ordenou non só o precinto da zona que veu abaixo, senón de todo o entarimado por motivos de seguridade. Tan só permanece aberta ao paso unha pequena zona que dá acceso aos pantaláns e que non supón risco para o público.
Ademais, a xuíza acordou que tanto policía científica como xudicial realicen as tarefas necesarias para o esclarecemento dos feitos. Entre estas dilixencias atópase a realización de periciais e solicitar diferente documentación de Concello e Porto, así como do organizador do evento, en especial sobre o plan de seguridade.
