Tres persoas faleceron este sábado no hospital de Lugo diagnosticadas con coronavirus, dous delas procedentes da residencia de maiores do Incio. Deste xeito, a cifra total de mortos desde que comezou a pandemia ascende a 659 en Galicia.
En concreto, a Consellería de Sanidade informou na tarde deste sábado do falecemento de tres mulleres de 82, 86 e 87 anos, respectivamente, que se atopaban hospitalizadas no Hospital Lucus Augusti (Hula). En todos os casos presentaban patoloxías previas, sinalaron as mesmas fontes.
Dous das falecidas procedían da residencia do Incio, intervida pola Xunta e que rexistra un gromo con máis dun centenar de afectados. Con estes dous novos decesos, son xa 14 os mortos relacionados con este foco.
As mortes coa covid-19 foron subindo nas últimas semanas, co aumento dos gromos e os contaxios na comunidade galega. Desde ‘a nova normalidade' notificáronse un total de 39 decesos, o primeiro deles, o dunha muller o pasado 7 de agosto en Ourense.
