O presidente de Caixanova, Julio Fernández Gayoso, e o presidente da Asociación Ruta do Viño Rías Baixas, José Ramón Meiriño González, asinaron un convenio de colaboración que permitirá a promoción do enoturismo desta zona de Galicia. A través deste protocolo de cooperación, a caixa e a asociación buscarán iniciativas conxuntas orientadas a incrementar o coñecemento deste viño no ámbito xeográfico da Denominación de Orixe Rías Baixas.
O convenio, que terá unha duración dun ano, reforza a aposta de Caixanova polos sectores crave que conforman o tecido produtivo de Galicia. O acordo garante unha gran repercusión dos viños do D.O. Rías Baixas, grazas ás diferentes alternativas de difusión emprendidas como a edición de materiais de comunicación, a realización de presentacións do produto ou o deseño dun vídeo promocional. O protocolo de colaboración tamén impulsará a celebración conxunta de actos, conferencias, seminarios, congresos, exposicións, cursos, foros de formación ou reunións.
A firma do texto permitirá que os clientes de Caixanova obteñan grandes beneficios, xa que optarán a ofertas permanentes e contidos especiais, tanto dos produtos da propia asociación enoturística, como en establecementos adheridos ás diferentes rutas. O trato preferente aos clientes da entidade financeira poderá incluír tamén actividades e viaxes especiais en calquera das cinco rutas definidas.
De xeito recíproca, este acordo permitirá que cada oficina da caixa galega no ámbito xeográfico do D.O. Rías Baixas conteña información preferente desta oferta enoturística. A Escola de Negocios Caixanova, con gran traxectoria noutros sectores crave da economía autonómica, poderá colaborar na actualización do Plan de Mercadotecnia da agrupación. De xeito independente, os asociados de Ruta do Viño Rías Baixas poderán acollerse a condicións financeiras especiais.
Historia
A Ruta do Viño de Rías Baixas constitúese en 1996, momento no que só abarcaba a provincia de Pontevedra e no que os únicos establecementos adheridos asociados eran adegas. é importante destacar que esta iniciativa arrinca do sector empresarial de Rías Baixas, que ve a necesidade de ampliar as posibilidades de negocio e para iso inspírase nas experiencias doutras rexións vitivinícolas europeas (Borgoña, Bordeus…). é nese primeiro momento cando se deseña a primeira sinalización das adegas e publícase o primeiro mapa da ruta. Todo iso coa colaboración e a achega económica das adegas participantes.
No entanto, debido á falta de contido turístico da ruta, en 2004, baixo a dirección de Turismo Rías Baixas e a proposta do Consello Regulador comeza unha nova andaina tendente a promovela, buscando novos socios noutros sectores como a hostalería, a restauración, turismo rural… No 2005, a Fundación Comarcal Exposalnés retoma o proxecto e vincúlao a través de ACEVIN (Asociación de Cidades Españolas do Viño), ao obxecto de certificar a ruta. Nesta nova andaina incorpóranse concellos, adegas e diversos establecementos vinculados ao turismo, todos eles na subzona do Salnés.
Na actualidade, a Ruta do Viño Rías Baixas é un dos catro itinerarios acreditados por Rutas do Viño de España e a primeira galega. Conta con 93 asociados entre os que se atopan adegas, diferentes establecementos de hostalería (como vinotecas, restaurantes, hoteis, casas de turismo rural…), asociacións empresariais, cámaras de comercio e institucións (deputacións, concellos…), entre outros. A súa oferta componse de cinco itinerarios, catro deles transcorren polo Salnés, e o quinto faio pola subzona do Rosal. Neste momento a Asociación Ruta do Veu Rías Baixas está a traballar por ampliar os seus itinerarios ás tres subzonas restantes (Ribeira do Ulla, Soutomaior e Condado do Tea).
