O alcalde de Becerreá e deputado non adscrito na Deputación de Lugo —tras o expediente aberto polo PSdeG—, Manuel Martínez, foi expulsado na mañá deste xoves dunha comisión informativa na que se debatía o plan de obras e servizos.
Segundo indicou Martínez, o incidente polo que foi desaloxado polo presidente, o socialista Darío Campos, produciuse cando expuxo ao final da comisión "a necesidade de racionalizar o uso das comisións".
"Eu tiven que vir o martes á comisión de Suplusa (Sociedade Urbanística Provincial), hoxe a outra e mañá, a outra. Cando aquí sempre se facían nun día, salvo unha cousa extraordinaria", protestou.
O rexedor de Becerreá, que traballa de profesor na súa localidade, indicou que "non" ten persoal que o substitúa cando el falta no colexio, comentario que desencadeou, segundo a súa versión, a súa expulsión.
"Cando eu falto substitúenme uns mestres do colexio e iso pareceulle mal (a Campos), polo ton. E a partir de aí, expulsoume das comisións informativas, unha cousa que nunca me ocorreu nos 40 anos que levo en política", lamentou.
Campos expulsa a Martínez dunha comisión na Deputación de Lugo
Na reunión debatíase o plan de obras e servizos ► "Nunca me ocorreu nos 40 anos que levo en política", lamentou o alcalde de Becerreá e deputado non adscrito
