A Policía Autonómica ten baixo protección a 215 vítimas de violencia de xénero en Galicia. O groso dependen das xefaturas da Coruña (57) e Vigo (55), mentres que outras 31 atópanse en Ourense, 31 en Santiago, 26 en Lugo e 15 en Pontevedra. Na súa salvagarda, na que tamén colabora o Corpo Nacional de Policía, están implicados trece axentes en labor exclusivo, así como outros 66 efectivos de reforzo, que conxuntamente desenvolven un operativo de vixilancia activo as 24 horas do día durante os 365 días do ano.
O director xeral de Emerxencias, Luis Menor, e o comisario xefe da Policía Autonómica, Silverio Blanco, reuníronse este xoves para facer balance da actuación da Unidade da Policía Adscrita (Upa) en materia de loita contra a violencia de xénero, nun ano no que os asasinatos machistas cobráronse máis dunha trintena de vidas en España. Segundo os datos achegados, desde que o corpo autonómico asumiu competencias na materia, en setembro do exercicio pasado, houbo trinta detencións de persoas vinculadas a violencia de xénero, así como 1.176 identificacións de persoas e máis de 20.700 accións de contravixilancia.
Do mesmo xeito, a Policía Autonómica tamén atendeu, desde que é competente en casos de violencia de xénero, máis de 2.400 chamadas telefónicas e contactou en case 3.400 ocasións con vítimas. Estas actuacións levan a cabo en colaboración coa Xefatura superior de Policía de Galicia e permiten coordinar o tratamento das ordes de protección co seguimento integral dos casos de violencia de xénero. Os axentes policiais recibiron así mesmo formación específica, tanto teórica como práctica, de como xestionar casos relacionados coas súas novas competencias.
As funcións que desenvolven pasan, fundamentalmente, por desprazar medios ante avisos de episodios de violencia, en colaboración coa Policía Nacional; prestar atención singularizada á vítima, traslado das vítimas ao centro asistencial cando sexan agredidas, acompañamento en comisaría, recollida de datos sobre o agresor e posta en marcha de medidas de seguridade oportunas, entre outras cuestións.
Galicia figura entre as comunidades autónomas con menor proporción de vítimas de violencia machista en relación á súa poboación, segundo o Observatorio contra a violencia doméstica e de xénero, un órgano dependente do Consello Xeral do Poder Xudicial. Os datos dese órgano indican que a proporción de vítimas por cada 10.000 mulleres supera a media nacional (16) en Baleares (20,9), Comunidade Valenciana e Canarias (20), mentres que o máis baixo é o de Castela e León (9,8), A Rioxa e Galicia (10).
