Unha persoa faleceu este domingo e outras 15 resultaron feridas, dúas delas de carácter grave, nunha explosión orixinada por causas que se descoñecen nun piso dun edificio situado no centro de Premià de Mar (Barcelona).
Segundo informaron os Bombeiros da Generalitat, a explosión orixinouse sobre as 8:24 horas da mañá deste domingo no segundo piso do edificio número 194 da Gran Vía de Lluis Companys de Premià de Mar.
Un total de 16 dotacións dos Bombeiros, oito ambulancias e un helicóptero medicalizado están no lugar do sinistro, acordoado pola policía local e os mossos d'esquadra.
A explosión, cuxas causas se están investigando, produciuse no segundo piso do edificio, que ten sete plantas, con tres pisos por planta. O inmoble foi completamente evacuado polos bombeiros.
Por mor da explosión, que segundo os veciños foi de grandes proporcións, orixinouse un incendio que afectou tamén a outras vivendas. Os Bombeiros da Generalitat xa extinguiron o incendio e están a revisar a estrutura do edificio conxuntamente con técnicos municipais.
Segundo datos do Sistema de Urxencias Médicas (SEM), hai unha vítima mortal e 15 persoas feridas, das cales dúas son de carácter grave, unha menos grave e doce delas leves.
Algunhas das persoas feridas de carácter leve non foron derivadas a centros hospitalarios senón que se lles atendeu no mesmo lugar do sinistro e foron dadas o alta in situ.
Tamén se desprazaron ata o lugar 11 patrullas dos Mossos d'Esquadra e efectivos da Policía Local, entre outros. A Dirección Xeral de Protección Civil activou en nivel de prealerta o Plan de Protección Civil de Cataluña.
Unha persoa morta e 15 feridos nunha explosión nun piso de Premià de Mar
O suceso, cuxas causas se están investigando, provocou un incendio que afectou a varias vivendas
