A Garda Civil desarticulou unha banda á que se lle imputan polo menos unha vintena de roubos na provincia da Coruña nun operativo que se saldou con dez detidos.
A Unidade Orgánica de Policía Xudicial da Garda Civil da Coruña actuou contra este grupo criminal composto por mozos de entre vinte e trinta anos, todos eles naturais e veciños da Coruña e pobos limítrofes que se dedicaban ao roubo de domicilios habitados en zonas rurais.
Aproveitaban a ausencia dos moradores das vivendas e entraban nas casas a través dunha porta ou unha fiestra que romperan previamente cunha pedra. Facíano para subtraer principalmente diñeiro en efectivo e xoias, aínda que tamén se facían con teléfonos móbiles, televisións, videoconsolas e incluso radiadores.
Os roubos foron perpetrados de xeito maioritario nas poboacións de Abegondo, Carral e Ordes, nun caso que investiga o xulgado de instrución número catro da Coruña. En tres rexistros puidéronse atopar numerosos efectos procedentes de roubos, que serán entregados aos seus lexítimos donos.
Dez detidos por roubar en polo menos vinte vivendas da provincia da Coruña
Entraban en casas de zonas rurais para subtraer diñeiro, xoias, teléfonos móbiles, televisións e incluso radiadores
