Dous establecementos galegos, Aniceto Rodríguez na Coruña e Casa Samaniego en Vigo, foron incluídos na guía das mellores vinotecas de España 2009, editada pola aula Marqués de Arienzo e a revista Vino+Gastronomía.
A guía, que foi presentada na Coruña polos responsables de Aula Marqués de Arienzo, recolle as cen mellores vinotecas de toda España e os 20 espazos gastronómicos máis significativos, entre os que se atopan chocolaterías ou establecementos delicatessen.
A cultura do viño
Para iso, utilizaron os criterios de variedade e número de referencias, a especialización, a traxectoria, o número de actividades que realizan nas súas instalacións para divulgar a cultura do viño e, sobre todo, "a atención ao cliente," explica María Souto, do departamento de mercadotecnia de Marqués de Arienzo.
O establecemento Aniceto Rodríguez foi fundado na Coruña en 1810, co nome de Dans, o apelido do tataravó do actual propietario, que centrou o seu negocio nas referencias de viños da xeografía española.
Na actualidade, os clientes poden atopar uns 250 rexistros de viño, ao que suma a oferta de máis dun centenar de licores, parte deles de orixe galega.
Os mellores viños, mención aparte
Pola súa banda, Casa Samaniego, de Vigo, a outra seleccionada, fundada no 2001, conta con máis de 900 referencias vinícolas, de todas as denominacións de orixe de España e cunha ampla zona de degustación onde gozar destes viños e dos seus produtos gourmet.
A guía inclúe nesta sexta edición o espazo coa mellor selección de viños, que recaeu na barcelonesa Vila Viniteca, con 7.000 referencias nos seus andeis e o mellor profesional do viño, para Juan Carlos Navares, propietario de Adegas Pipo.
Madrid e Cataluña son as dúas comunidades que contan con maior número de vinotecas seleccionadas, dezaoito en cada un dos casos, mentres que Estremadura e A Rioxa contan cunha soa destacada nas 132 páxinas desta guía na que se analizaron máis de mil vinotecas de todo o territorio nacional.
