O crítico Luís Paadín outorga na súa guía medallas a 90 viños de Ribeira Sacra

A Guía de Vinos, Destilados y Bodegas de Galicia 2015, que elabora o catador Luís Paadín, recolle 90 medallas para os viños da Ribeira Sacra. A cifra case triplica as 35 distincións que os caldos da denominación lograron na anterior edición, a de 2014.

A publicación, que cumpre tres ano de vida, valora os caldos de todas as denominacións de orixe galegas e distínguelles con tres tipos de galardóns, gran medalla de ouro, ouro e prata. No caso da Ribeira Sacra outorgou once grandes ouros só a viños tintos, 51 medallas de ouro a brancos e tintos e 28 medallas de prata tamén a brancos e tintos. Para puntuar os caldos, o crítico Luís Paadín realizou catas a cegas en todas as denominacións.

A guía, do mesmo xeito que nas tres edicións anteriores, foi editada por Servino Consulting a través do sistema de micro-mecenado e nesta edición realizouse unha tirada de 2.000 exemplares que se poden adquirir ao prezo de 20 euros o exemplar en superficies comerciais, librerías e vinotecas especializadas.

A publicación conta con máis de 1.400 referencias de viño, 523 adegas e destilerías e 535 fichas de cata.

No caso da denominación de orixe Ribeira Sacra analizáronse os caldos dun total 93 adegas pero cada unha delas presentou varios viños ás catas. Por exemplo, a adega que máis premios acumula é Adegas Moure (O Saviñao) con oito galardóns a outros tantos viños. No caso da firma Algueira (Sober) distínguense sete caldos e outras adegas, como Adega Cachín, Casa Moreiras, Adega Vella ou o enólogo Roberto Regal, acumularon catro galardóns aos seus viños.

A publicación inclúe xunto a cada viño unha ficha técnica con datos referidos á súa produción, a inclinación do viñedo e outras cuestións técnicas. Pero tamén se dá outro tipo de información como o prezo da botella e unha breve referencia a aspectos cualitativos do viño como a presenza de froita, a referencia ao terreo, os matices de madeira ou unha previsión sobre a evolución dos caldos en botella.

O presidente da denominación, José Manuel Rodríguez, encomiou a publicación e a súa capacidade para achegar o viño ao consumidor do montón, así como a rigorosidade das valoracións.