O Pan de Cea chegará á Rioxa grazas a un acordo que se asinará cunha empresa aceitera desta comunidade co obxectivo de promocionar o produto, natural do concello ourensán de San Cristovo de Cea.
Os produtores do pan de San Cristovo de Cea e o aceite de oliva virxe extra da Rioxa, están a tramitar un acordo que fará posible o irmandamento de dous produtos amparados por distintivos de calidade a nivel autonómico e europeo.
Este convenio, que se espera dea os seus froitos en setembro, suporá un gran avance para o pan galego xa que, A Rioxa, é a única comunidade española onde aínda é un gran descoñecido. Por iso o presidente do Consello Regulador do Pan de Cea, Carlos Manuel Rodríguez, mostrouse “moi esperanzado e interesado” ante o futuro irmandamento destes dous produtos.
Carlos Manuel Rodríguez explicou que traballan ''cada día'' para ''expandir aos puntos que sexan posibles e factibles, o máximo que se poida'' e ''mandar e exportar o pan de Cea''.
Nese sentido, manifestou que para o concello de San Cristovo de Cea sería ''un punto de partida, digamos un chanzo máis nos banzos que temos que subir para saír desta crise económica e polo tanto sería unha lombeirada forte que o pan se tivese e comercializásese alí''.
O presidente do Consello Regulador engadiu que ademais de ''abrirse'' a este novo mercado o irmandamento entre o pan e o aceite suporá tamén un ''gran avance'' para Galicia porque ''permitirá seguir promocionando os seus produtos máis aló das fronteiras da comunidade'' avogando así pola ''diversidade e a calidade''.
Carlos Manuel Rodríguez asegurou que o Pan de Cea, ao contar con Denominación de Orixe debe ''expandirse a outros lugares'' e ''contribuír á diversidade'' porque ''canta máis xente se interese nos nosos produtos para que coñeza a calidade dos mesmos lograranse ''abrir novos mercados'' e isto último, engadiu ''sempre está en míraa dos nosos proxectos''.
