Na costa de Lugo, e en particular no municipio de Cervo, está a alcanzar un prestixio crecente, desde o punto de vista gastronómico, o ourizo de mar. Trátase dun ingrediente que tradicionalmente non tivo moito predicamento nos fogóns galegos, pero que empeza a abrirse oco.
Unha das consecuencias diso é o auxe da festa que exalta este produto, que alcanzou a consideración de "interese turístico”.
A festa do ourizo de San Cibrao conta coa participación dunha gran parte dos establecementos hostaleiros da localidade (bares e restaurantes), que preparan este marisco de diferentes formas: en empanada, tortilla, en croquetas, cocidos, ao natural e outras.
A degustación comeza ao redor das seis da tarde e é amenizada por un grupo de gaiteiros, que percorre os locais participantes.