A Festa do Pemento de Herbón (municipio de Padrón) ten lugar cada primeiro sábado de agosto.
Esta celebración goza do recoñecemento de Festa "de Interese Turístico". Alcanzou tal declaración oficial en virtude da resolución da Xunta de Galicia do 15 de outubro de 2001, publicada no Diario Oficial de Galicia do 31 do mesmo mes.
Cada agosto, Padrón e Herbón réndenlle homenaxe ao produto que os fixo famosos no mundo enteiro, ata o punto de que xa no norte de África emprégase o seu nome para etiquetar pementos da mesma variedade, por moito que, evidentemente, non sexan de Padrón nin de Herbón.
Este produto converteuse nun dos máis populares da despensa galega en época estival. Ideais para acompañar un viño, os pementos de Padrón gozan de gran predicamento, de xeito particular, nos bares e zonas de tapeo da área de Compostela, especialmente nos meses de verán.
A preparación tradicional é sinxela: frítense en abundante aceite, ben quente, e sálganse ao gusto. Normalmente en abundancia.
Recheos
Nos últimos tempos, as novas tendencias da cociña tamén chegaron ao humilde pemento de Padrón, ata o punto de que algúns chefs se atreven, ata, a enchelos, nunha sorte de elaboración en miniatura. Tal é o caso de, por exemplo, o chef do Hotel Hesperia Finisterre, "Perico" Fernández, que os rechea de queixo de cabra.
