O presidente do consello regulador da IXP Pan de Cea, Carlos Rodríguez, explicou que os 18 fornos asociados están a prepararse para elaborar unhas 2.500 pezas de pan para a súa venda e degustación gratuíta durante todo o día 4 de xullo.
Ademais hai uns días que recibiron a declaración de Festa de Interese Turístico, realizada pola Xunta de Galicia, o que dará "maior relevancia a esta cita gastronómica e á promoción do municipio de San Cristovo de Cea", agregou.
Programa da festa
A celebración comezará o sábado día 3 de xullo cunha obra de teatro a cargo da compañía Produccions A Contrabutaca, co título de "Un morto moi vivo" que poderá verse na praza maior de Cea.
A festa gastronómica será o domingo día 4 e terá como preámbulos os pasarrúas musicais, a recepción de autoridades, o pregón a cargo de Moncho Borrajo e a entrega de insignias de ouro a un matrimonio de panadeiros que se xubila este ano.
A partir de aí, a comida no Campo da Saleta ocupará sombras e carpas preparadas para 7000 comensais que poderán degustar todos os produtos protexidos por IXP e DO de Galicia, como viños, queixos, augardentes, carne de tenreira, lacón, patacas, fabas e produtos ecolóxicos, todos eles acompañados por algunha das 2.500 pezas de pan de Cea que se elaborarán nos fornos artesáns do municipio.
Pola tarde están previstas varias sesións de baile e, no medio delas, unha degustación gratuíta de chourizos, pan de Cea e viño.
Historia da festa
O pan de Cea conta coa súa festa de exaltación desde 1992 e coa súa IXP desde 2004 pero a historia dos seus panadeiros xorde no século XIII e conta con referencias históricas como o censo do marqués de Ensinada de 1752, que evidenciou a existencia de doce panadeiros entre a poboación.
Para que o pan sexa pan de Cea
Este produto elabórase con fariña de trigo, auga e sal, de forma tradicional, en fornos de leña e cunha presentación de forma alargada, redondeada nos extremos e cunha fenda transversal no centro que diferencia cada peza en duas partes iguais.
O regulamento da IXP define a presentación deste pan en pezas de 0,5 quilogramos e 1,2 quilogramos elaboradas nun proceso que inclúe tres fases de amasado, unha cocción en tres etapas e mínima de 120 minutos, maduración dunha hora e en fornos tradicionais, con bóveda de media laranxa ou semiesférica e combustibles de natureza vexetal, é dicir, de madeira.
