O presidente do Consello Regulador Ribeira Sacra, José Manuel Rodríguez, confirmou que o pasado ano foi "de continuidade" e "consolidación" na denominación de orixe, dado que as vendas mantivéronse estables a pesar da crise económica, cunha lixeira subida, duns 11.000 litros, con respecto a 2011.
En declaracións a EFE, José Manuel Rodríguez confirmou que o ano pasado as adegas inscritas no rexistro da denominación de orixe embotellaron 3.425.395 litros de viño, fronte aos 3.414.746 comercializados no exercicio anterior, o que supuxo un incremento de 10.649 litros.
Segundo Rodríguez, os datos obtidos no pasado exercicio son, sen dúbida, para "sentirse contentos", porque a denominación de orixe foi capaz de manter o seu volume de vendas nun momento económico moi complicado e "sen necesidade de baixar os prezos", como fixeron noutras zonas vitivinícolas.
"Noutros lugares mantiveron as cifras de vendas, pero en base a baixar os prezos", dixo o presidente de Ribeira Sacra, algo que no caso desta denominación "non se fixo", porque a produción e venda de viño é "un negocio" e ao final o que conta é o volume final de facturación.
De feito, subliñou "os prezos mantivéronse en toda a Ribeira Sacra" e incluso subiron un pouco "nos viños de primeira liña" e nos caldos "de autor", que son "o espolón" da propia denominación de orixe "para ir abrindo camiño" nos mercados.
