Mar de Envero chegará a México da man da cadea de establecementos máis importantes do país azteca. Este mequeiro albariño venderase na sección gourmet de Palacio de Ferro, ao exclusivo grupo que toma o seu nome do edificio onde abriu a súa primeira tenda en 1891.
A Quincena de Galicia terá lugar en outubro, coincidindo co inicio da tempada outono/inverno 2009 en 10 prestixiosas tendas do Palacio de Ferro (7 na zona metropolitana de México D. F., en Poboa, Monterrei, e Guadalaxara). Os produtos que representarán á nosa comunidade nesta iniciativa da CEG, a Cámara de Comercio da Coruña co apoio de IGAPE, foron sometidos a un estrito proceso de selección para o que se desprazou en xaneiro José Ángel Sánchez-Aedo, director da división Gourmet do Palacio de Ferro.
Ademais en setembro a adega compostelá foi invitada a participar nunha misión directa en México para buscar distribuidores alí que lles faciliten a entrada nese mercado onde o albariño destaca entre os produtos galegos máis demandados.
Por outra banda, Mar de Envero continúa afianzando a súa presenza no mercado nacional e participa esta semana na Festa do Albariño de Cambados.
A pesar do difícil contexto económico, Mar de Envero conseguiu situarse nas cartas de preto dunha centena dos mellores restaurantes e tendas especializadas de Galicia, Asturias e País Vasco. Tamén está presente a través de distribuidores en Murcia, Cataluña, Valencia e pronto o estará no resto de España. Este Albariño, intensamente aromático no que se aprecian aromas e froitas tropicais, notas de mazá e froitas de óso, é o primeiro dos viños elaborados pola adega creada polos santiagueses Manyo Moreira, Miguel Ángel Gómez e Breixo Raimóndez.
