Galicia atópase este mércores nunha zona intermedia entre altas e baixas presións, coa que conforme avancen as horas se irá recuperando o ceo azul. Así, empezará a xornada parcialmente cuberto e quedará despois pouco nubrado ou despexado.
Atendendo á información de Meteogalicia, nun día con algúns bancos de néboa nas primeiras horas, o vento soprará frouxo de compoñente oeste e as temperaturas non experimentarán cambios significativos. Así, as máximas moveranse entre os 23 graos da Coruña e os 31 de Ourense. E as mínimas oscilarán entre os 16 e os 18.
