A Queimada Popular de Cervo está declarada de interese turístico galego dado o poder de convocatoria que demostra desde hai décadas.
Nesta cita de referencia do verán na Mariña lucense consómense uns 2.500 litros de augardente.
A festa, que alcanzou a distinción “de interese turístico” no ano 2001, celébrase sempre o sábado seguinte ao 16 de agosto.
Ao longo do día teñen lugar en Cervo diversas actividades, entre as que destaca o Mercado Tradicional, así como a exhibición de billarda (estornela), un deporte popular e tradicional galego que na Mariña de Lugo está a recuperar un esplendor pasado coa liga Nacional de Billarda (LNB).