A fábrica de Sargadelos, situada no Castro, no municipio coruñés de Sada será o escenario, desde o mércores ata o venres, dun taller internacional que ten lugar por primeira vez este ano baixo a denominación de 'Cerámica e Gastronomía'.
Dirixido pola profesora Marta Rois, e co que colabora o Centro de Artesanía e Deseño de Lugo, o taller deu comezo a pasada semana nas instalacións que a marca galega de cerámica ten a localidade do Cervo, en Lugo. Alí desenvolveuse toda a primeira parte do proceso que agora finalizará en Sada. Levouse a cabo unha investigación que servirá agora de apoio para a concreción dos proxectos. Con este fin, tamén a casa Sargadelos pon a disposición dos participantes o seu centro de documentación, a súa exposición permanente, as súas cociñas e o asesoramento dos seus técnicos.
Doce serán os alumnos desta segunda fase do curso, cos que se darán cita profesionais de 6 estudos de deseño de grande prestixio. Entre eles, Javier Díez de 'Dez+Dez'; Luís Eslava e Lorena Sauras de 'Luís Eslava Estudo', Gabriela Schiavos e Gerard Sanmartí de 'La Granja'; Isaac Piñeiro, de 'Nadadora' e Xabier Rilo Calvo, Manuel do Río Regos e Ricardo Tubío Pazos, todos eles de 'Cenlitrosmetrocadrado' e 'Martín Azua'.
O taller ten como obxectivo a análise da interacción entre deseño e gastronomía en múltiples vertentes, por exemplo nos obxectos destinados a conter e servir os alimentos. Pretende dar aos alumnos unha visión realista e actual do traballo de deseño, ademais de dotalos de técnicas para chegar a ser orixinais sen deixar do lado a utilidade. Por iso, deberán presentar un proxecto final que será valorado polos profesionais invitados.
