domingo. 15.12.2019 |
El tiempo
domingo. 15.12.2019
El tiempo

España bate outra marca na doazón de órganos: 19 doantes en 24 horas

Intervención dun transplante. ARQUIVO
Intervención dun transplante. ARQUIVO
Participaron 27 hospitais de 13 comunidades, incluída Galicia

España volveu a bater un marca no sistema de doazón e transplante de órganos coa xestión, en menos de 24 horas, de 19 doantes falecidos —un deles procedente da cooperación internacional— que permitiron realizar 38 transplantes. Foi o pasado 29 de novembro, mes que o Ministerio de Sanidade cualifica de "excepcional", xa que houbo dous días nos que se contabilizaron 15 doantes, fronte aos seis diarios de media de 2018.

Grazas á solidariedade das familias dos 19 falecidos puidéronse levar a cabo 38 transplantes: 23 renais, 10 hepáticos, dous bipulmonares, dous cardíacos (un deles infantil) e un transplante combinado de páncreas-ril. Dous dos transplantes (un hepático e un cardíaco) realizáronse en situación de urxencia "cero", e no caso dos renais dous dos pacientes estaban incluídos no Programa de Acceso ao Transplante para Hiperinmunizados.

Participaron nos distintos operativos 27 hospitais de 13 comunidades autónomas, incluída Galicia, e un hospital francés. Para levar a cabo o operativo, a Organización Nacional de Transplantes (ONT) contou coa colaboración de diferentes organismos públicos e privados, así como cos servizos de emerxencias e protección civil das comunidades implicadas. Ademais, mobilizáronse oito voos para trasladar equipos e órganos, cinco deles en voos privados e tres en comerciais, e supuxo a participación de doce aeroportos. 

O marca anterior, que foi o 14 de decembro de 2015, estaba establecida en 15 doantes falecidos e un doante renal vivo en menos de 24 horas. Ese día realizáronse tamén 38 transplantes. 

España bate outra marca na doazón de órganos: 19 doantes en 24 horas
Comentarios