Axentes da Policía Local de Vigo detiveron por un delito de tentativa de agresión sexual a un varón de 20 anos que supostamente se baixou os pantalóns diante dunha muller á que despois colleu do pelo e a forzou a inclinar a cabeza contra os seus xenitais.
Segundo informou a Policía Local, sobre as 13,00 horas deste martes recibiuse un aviso de que un mozo –do que achegaron as súas características– intentara agredir sexualmente a unha muller no club de remo Virxe da Guía.
Unha patrulla desprazouse ata o lugar, e, a partir da descripción física, puido localizalo na baixada á praia da Punta. Alí, o varón, de iniciais N.R.A., nacido en Colombia e domiciliado en Vigo, foi identificado e empezou a responder con incoherencias ás preguntas dos actuantes.
Outra patrulla trasladou entón á vítima, de 47 anos, xunto ao agresor, ao que recoñeceu "sen dúbida". A muller explicou que momentos antes estaba sentada nun banco do club cando o home se sentou ao seu lado e, sen mediar palabra, baixou os pantalóns e colleuna do pelo forzándoa a inclinar a cabeza contra os seus xenitais.
Ela repeleu a agresión e produciuse un forcexo entre ambos, ata que nun momento dado el intentouna tirar por unhas escaleiras, para fuxir pouco despois á carreira. Tras este episodio, ela mesma contactou inmediatamente por teléfono coa Policía Local, e finalmente o mozo foi detido.
