Dous homes foron detidos na Coruña como presuntos autores dun suposto delito de estafa en grao de tentativa por tratar de estafar a un empresario co timo dos billetes tintados. A detención destes dous homes, veciños da Coruña e Madrid, de 35 e 31 anos, practicouse o pasado venres, segundo informan este luns fontes da Garda Civil.
O timo frustrado comezou cando os agora detidos contactaron cun empresario dedicado á venda de cabalos de competición e simularon ser empresarios interesados na compra dunha corentena de equinos para trasladalos a Guinea. Nunha das reunións sobre a suposta compra, os estafadores fixeron unha proba na que, supostamente, converterían varios cartóns pintados de cor negra en billetes de 50 euros, utilizando uns líquidos especiais.
Ante a sospeita de que se tratase dunha estafa, o empresario denunciounos ante a Garda Civil, que montou un dispositivo de vixilancia e control no lugar onde os estafadores citaran de novo ao empresario. Neste novo encontro, os falsos empresarios pedíronlle entre 2.000 e 3.000 euros para poder facer a conversión de todo o diñeiro que necesitaban para abonar os cabalos que querían comprar e foi nese momento cando os axentes procederon á detención dos estafadores.
Na operación incautáronse de dúas cheas de cartolinas negras e unha botella que contiña o líquido co que supostamente convertían estas cartolinas en billetes. As detencións foron dirixidas desde o Xulgado de Instrución Número 8 da Coruña, cuxo titular decretou o ingreso en prisión para un dos detidos sobre o que, ademais, xa había unha orde de detención en vigor ditada por un xulgado de Madrid. O outro detido quedou en liberdade.
Dous detidos por intentar estafar a un empresario con billetes tintados
A detencion dos dous homes, da Coruña e Madrid, produciuse o pasado venres aínda que non se coñeceu ata este luns
