Unha persoa tivo que ser liberada do seu vehículo en Camariñas por efectivos de Protección Civil da zona logo de sufrir un accidente. O suceso ocorreu na parroquia de Ponte do Porto. Tratábase dun vehículo sen carné que chocou cun turismo, segundo informaron fontes do 112.
Os servizos sanitarios requiriron a presenza dos bombeiros de Cee xa que, nun primeiro momento, o particular indicou que a persoa estaba atrapada no coche. Finalmente, non foi necesario que interviñesen os membros do parque comarcal.
Unha vez liberada -só foi preciso romper un dos cristais do vehículo-, os servizos de urxencia atenderon á persoa ferida no lugar do accidente. Ademais, participaron no dispositivo os axentes da Garda Civil e o servizo de limpeza e mantemento da vía.
