Un home acusado de intentar matar a súa exparella nun bar da Coruña en 2014 asegurou este luns que os feitos ocorreron "sen querer" tras un tropezo mentres el portaba un coitelo.
A sección primeira da Audiencia Provincial da Coruña acolle este luns e este martes un proceso contra un home que presuntamente en agosto de 2014 agrediu á que foi a súa parella entre 2002 e 2012 e que se atopa en prisión desde o día dos feitos.
Asegura a Fiscalía no seu escrito de cualificacións previas que o procesado acudiu ao bar Yesterday, situado na coruñesa rolda de Outeiro, cun coitelo que tiña unha folla de dez centímetros co que feriu "de xeito indiscriminado" a súa exparella, que traballaba alí, "mentres lle gritaba que a ía matar".
Recoñece o escrito que o acusado presenta un trastorno da personalidade e capacidade intelectual límite, aínda que isto non afecta ás súas capacidades e, polo tanto, acúsao dun delito de homicidio en grao de tentativa co agravante de parentesco.
Pide nove anos e dez meses de prisión, que priven ao procesado da patria potestade da filla que ten coa agredida, agora de seis anos, afastamento e perda de permiso de portar armas durante dez anos e ademais de 16.850 euros de indemnización e os gastos do Sergas.
O acusado asegurou durante a vista que "foi sen querer" e que todo se debía a unha conversación que desexaba manter coa súa exparella para poder ver a súa filla.
Portaba un coitelo porque o entón noivo da agredida pegoulle "uns golpes na cabeza" e colleu "medo", e despois sempre ía cunha arma branca encima, argumentou.
O día dos feitos saltou a barra do bar "para evitar que ela chamase aos seus amigos" e co coitelo na man ata que, sempre segundo a súa versión, tropezou con ela e produciulle as feridas.
Recoñeceu que a Policía Local díxolle que "a quería matar" e tamén que pola súa filla faría "o que sexa", xa que apenas a podía ver dous días ao mes.
Na súa declaración comentou que está diagnosticado de esquizofrenia e alucinacións paranoides, e que no seu momento intentouse suicidar porque "estaba mal".
Agora di que está "arrepentido" do que ocorreu o 15 de agosto do ano pasado e mostrou o seu desexo de "ver" a súa filla, que é o "único" que quere.
A vítima apuntou ante o tribunal que o acusado a "insultaba" e "sempre a ameazaba", incluso de morte, e corroborou os feitos que apunta a Fiscalía nas súas conclusións previas.