Un motorista foi evacuado este mércores polo helicóptero medicalizado con base en Santiago tras sufrir unha caída en Fisterra.
O accidente rexistrouse ás 14.30 horas cando o motorista circulaba cerca do IES Fin do Camiño, en dirección a Mar de Fóra. Ata o lugar desprazáronse axentes da Policía Local e voluntarios de Protección Civil.
ACCIDENTES EN FENE E CESURAS. Durante a tarde deste mércores rexistrouse outro accidente de tráfico en Fene. Foi unha colisión entre dous turismos na AC-133, ao seu paso pola parroquia de Barallobre. A causa do impacto, dúas persoas resultaron feridas, e incluso unha delas necesitou a axuda dos bombeiros para abandonar o vehículo sinistrado.
O 112 Galicia recibiu a alerta pouco antes das cinco da tarde e avisou aos Bombeiros de Ferrol, aos membros do GES de Mugardos, ás forzas da orde e aos servizos sanitarios de urxencia.
Outras tres persoas tiveron que ser atendidas en Cesuras tras sufrir un accidente na AC-840, concretamente en Santa Cruz cara a Betanzos. Un turismo saíuse da vía e chocou contra un farol ao redor das catro da tarde. O vehículo quedou envorcado e os seus dous ocupantes tiveron que ser trasladados ao centro hospitalario de referencia. Ademais, un peón foi atendido polos técnicos sanitarios, afectado por unha crise de ansiedade.
Un motorista resulta ferido grave tras sufrir un accidente en Fisterra
Durante a tarde deste mércores tamén se rexistraron outros sinistros en Fene e Cesuras que se saldaron con catro feridos
