A campaña das municipais en A Coruña arrinca este venres coa polémica xa servida pola non asistencia do alcalde herculino, Xulio Ferreiro, a un debate organizado por Ascega (Asociación de Emprendedores de Galicia) co resto de candidatos.
No seu lugar, Marea Atlántica enviou ao edil Alberto Lema, pero a organización, que só convidara aos cabeza de lista, non lle deixou intervir. Cando xa estaban o resto de participantes nas súas cadeiras, un dos organizadores colocou nunha cadeira baleira un boneco de trapo cunha cartolina coa cara de Ferreiro e unha camisa a cadros das que adoita empregar o rexedor.
Lema abandonou o recinto e todos os grupos da oposición coincidiron en lamentar o sucedido. No entanto, os aspirantes a alcaldía tamén lamentan que Ferreiro non acudise ata agora a varios debates organizados por asociacións da cidade.
O alcalde, pola súa banda, reaccionou con ironía: "Moitas grazas a Ascega pola homenaxe desta mañá. A camisa é chula, pero non a teño aínda no armario".
Moitas grazas a @ASCEGA_Oficial pola homenaxe desta mañá. A camisa é chula, pero non a teño aínda no armario 😉. Moito ánimo aos candidatos e ás candidatas para a campaña que comeza esta noite. Vémonos nos debates! pic.twitter.com/C2tOSuZDuD
— Xulio Ferreiro (@XulioFerreiro) 9 de maio de 2019