Jo Johnson, irmán de Boris Johnson e que ostentaba o cargo de secretario de Estado para as Universidades, dimitiu este xoves por tensións "irresolubles" ao atoparse "dividido entre a lealdade familiar e o interese nacional".
"Foi unha honra representar a Orpington (Inglaterra) durante nove anos e servir como secretario de Estado con tres primeiros ministros. Nas últimas tres semanas vinme dividido entre a lealdade familiar e o interese nacional", expuxo Johnson a través da rede social Twitter.
"É unha tensión irresoluble e é momento para que outros tomen o meu cargo", engadiu o irmán do actual primeiro ministro.
Esta dimisión chega despois de que o premier sufrise este mércores dúas novas derrotas na Cámara dos comúns, que deu luz verde a unha lei para bloquear un Brexit sen acordo e rexeitou, por agora, convocar eleccións o 15 de outubro.