Un elefante matou a 'pisotóns' a unha turista alemá nun parque natural de Zimbabue, informou este xoves a Efe un funcionario da Autoridade de Xestión de Parques e Vida Silvestre do país africano.
A muller,de 49 anos, que estaba en compañía doutros turistas, foi atacada por un elefante femia que se separou dunha manda este mércores pola tarde preto da entrada ao Parque Nacional Mana Pools, no norte do país.
"Camiñaban cun guía. Ao entrar no parque atopáronse cunha manda de elefantes e comezaron a facerlles fotos. Creo que querían achegarse o máximo posible aos elefantes", dixo a Efe o portavoz da Autoridade de Xestión de Parques e Vida Silvestre de Zimbabue, Tinashe Farawo.
Farawo sinalou que a muller e o seu grupo ingresaran a Zimbabue desde Zambia.
"Non sabemos que puido enfadar ao animal, pero pisou á muller", relatou Farawo, que asegurou que se están investigando os detalles deste "triste suceso".
A muller, aínda non identificada polas autoridades, recibiu primeiros auxilios momentos despois do ataque, pero faleceu polas súas feridas de camiño ao hospital.
Mana Pools, situado ao longo do río Zambezi no límite setentrional de Zimbabue con Zambia, é famoso por ser o único parque no que os turistas poden camiñar libremente sen contar cun guía ou un gardabosques.
A maioría dos elefantes deste parque séntense cómodos en presenza de humanos, e algúns incluso recibiron nomes.
Os ataques mortais de elefantes a turistas non son habituais, e prodúcense ocasionalmente en áreas fóra das reservas naturais onde estes mamíferos ás veces invaden os cultivos dos aldeáns.
