O secretario xeral de Podemos, Pablo Iglesias, negou no Senado que o seu partido reciba financiamento de Venezuela nin que el traballase para o goberno daquel país e defendeu as contas da formación morada como estritamente legais. E retou ao PP a crear unha comisión de investigación na Cámara se quere indagar no seu pasado antes de Podemos e no seu traballo universitario ou profesional, "que parece que hai barra libre".
Iglesias comparece este xoves ante a comisión de investigación sobre o financiamento de partidos políticos do Senado, na que se negou a responder a ningunha pregunta do PP sobre o seu pasado antes de Podemos, a pesar da insistencia do portavoz popular, Luís Aznar, co que se encerellou en varias ocasións.
Aznar insistiu en preguntar sobre a relación de Iglesias con Venezuela e Iglesias insistiu en limitarse a falar de Podemos. O ton entre ambos foi irónico e de respecto.
O dirixente de Podemos aproveitou para ler sucesivas sentenzas que negan ilegalidade no financiamento de Podemos, para "demostrar" que a súa formación tivo unha xestión económica "limpa". "Ninguén foi capaz de transformar as acusacións que se fixeron sobre nós que foron inxentes, nunha resolución xudicial", agregou. "Aburre vostede ás cabras", espetoulle Aznar. "Teñan paciencia", replicoulle Iglesias.
O dirixente de Podemos asegurou que Podemos non recibiu financiamento de Venezuela nin de ningun goberno estranxeiro nin organización exterior. "A nosa formación política finánciase con arranxo á lei", insistiu. Se o PP quere indagar na súa vida, pode crear unha comisión de investigación como esta sobre o financiamento de partidos ou como a dedicada á tese de Pedro Sánchez.
As interrupcións e pequena liorta entre os dous parlamentarios son constantes ao enrocarse Iglesias en que non vai responder sobre nada distinto ao financiamento de Podemos desde que se fundou en 2014, tampouco sobre a fundación CEPS (Centro de Estudos Políticos e Sociais) na que traballaron algúns dos fundadores do partido morado antes de crealo.
