A sección sindical do sindicato Sepla en Vueling convocou paros de 24 horas para os próximos días 25 e 26 de abril e 3 e 4 de maio polos "reiterados incumprimentos" por parte da aerolínea.
O Sepla indicou que estes incumprimentos se refiren a diversos artigos do convenio colectivo de pilotos e aos acordos que regulan as bases no estranxeiro.
Segundo o sindicato, a intención da compañía aérea de crecer a través destas bases "pode pór en risco os dereitos laborais e os postos de traballo dos pilotos de Vueling en España".
O sindicato, que declinou profundar máis nos motivos da folga á espera dunha rolda de prensa que se celebrará o venres en Madrid, asegurou que presentou a mañá deste xoves a convocatoria oficial ante os organismos competentes.
Fontes de Vueling explicaron que aínda non recibiron ningún documento oficial sobre a convocatoria dos días de folga, o que lles impide traballar nos servizos mínimos: "A nosa prioridade máis evidente son os pasaxeiros e afectarlles na menor medida posible".
"Levamos varios meses negociando e desafortunadamente non se chegou a ningún acordo. Temos o máximo respecto ao dereito de folga, pero lamentamos chegar a esta situación", aseguraron.