A Xunta disporá de 27,4 millóns de euros de fondos europeos para a rehabilitación e posta en valor de 12 bens de interese cultural (BIC) ata 2025, no marco do Plan Xacobeo Next Generation.
Dentro desta convocatoria de subvencións do Ministerio de Industria, Comercio e Turismo para proxectos sostibles de mantemento e rehabilitación do patrimonio histórico de uso turístico dos Camiños de Santiago do Plan turístico nacional Xacobeo 21-22, Galicia conseguiu o 40 % do total de 65 millóns dispoñibles.
Así o explicou o vicepresidente da Xunta, Alfonso Rueda, na rolda de prensa tras a reunión semanal do Goberno galego, na que agradeceu esta cantidade "importante" que lle corresponderá a Galicia, á vez que volveu a reivindicar que se amplíen as bonificacións fiscais de 2021 a este segundo ano de Xacobeo.
As actuacións aprobadas permitirán actuacións de rehabilitación de espazos públicos para o seu uso turístico, introducir melloras de sustentabilidade, accesibilidade e eficiencia enerxética ou modernizar ou impulsar a dixitalización destes espazos.
A maior das axudas vai destinada á fortaleza de Monterrei, con 16,9 millóns de euros, pero tamén haberá obras importantes no Parque do Pasatempo en Betanzos (1,8 millóns); na Ribeira do Lérez desde As Xunqueiras ata As Aceñas (1,2); a Torre de Hércules (1,2); no Paisaxe Cultural da Ribeira Sacra (1,7); e nos arquipélagos de Ons (1,7) e Sálvora (968.000 euros).
Haberá actuacións ademais no cárcere vello de Tui (484.000 euros), o conxunto histórico-artístico de Mondoñedo (330.148), no castelo de Santa Cruz da Guarda (242.000), nas Torres do Oeste en Catoira (363.000), e na Casa Museo de Valle Inclán de Vilanova de Arousa (522.901).
Rueda puntualizou que se elixiu aqueles proxectos que podían estar "máis maduros" á parte dos que eran de titularidade pública e non da Igrexa, como obrigaba a convocatoria, polo que descartou as críticas que poida haber por esta selección que foi "absolutamente obxectiva".
