O internacional español Iago Aspas negou este mércores que o vestiario do Celta de Vigo estea "preocupado" por atoparse con só tres puntos de vantaxe sobre a zona de descenso, aínda que tampouco ocultou a importancia do choque deste sábado contra o pechacancelas Huesca, ao que tachou de rival "directo".
"Hai que volver gañar. Ás veces entras nunha dinámica negativa e as cousas non che saen, o fútbol é así. Cando ía a xornada tres e gañámoslle ao Atlético de Madrid pareciamos o Barcelona de Guardiola e agora parecemos o equipo do meu pobo, que leva sete ou oito partidos sen gañar", comentou Aspas tras recoller o seu quinto Trofeo Estrela Galicia.
Cando ía a xornada tres e gañámoslle ao Atlético de Madrid pareciamos o Barcelona de Guardiola e agora parecemos o equipo do meu pobo
O atacante galego recoñeceu que o seu equipo necesita "unha vitoria" para recuperar a confianza, e insistiu en que non ve ao Celta na pelexa polo descenso porque "hai equipos moito peores que nós".
"Agora mesmo vénnos un rival case directo como o Huesca e temos que sacar adiante este partido, iso é importantísimo. Non é unha final porque aínda queda moita Liga pero está claro que a ninguén lle gusta verse aí abaixo", manifestou o máximo goleador celeste.
Cuestionado pola suplencia do internacional uruguaio Maxi Gómez en Anoeta, respondeu que "esas son situacións que ten que decidir o míster, eu non son o adestrador para pór ou quitar a un compañeiro".